كريب معمر. بحشوة مذهلة
مقادير الحشوة :
شوية الكفتة
شوية د الكروفيت
شريحتين أو أكثر الداند مدخن وممكن يتعوض بالمورتاديلا
أربع أو خمس أصابع من السوريمي
بصلة مشلضة
طون
زيتون
صلصة الطماطم
زيت بلدية
إبزار + سكنجبير + ملح + تحميرة + الحار إختياري
الطريقة : كنشحر البصلة فالزيت مع العطرية والملح حتى تدبال مزيان ونضيف الكفتة نفتتها مزيان حتى تطيب ونضيف الكروفيت منين يطيب نضيف صلصة الطماطم وباقي المكونات
نخلي الحشوة تبرد على ما نحضر الكريب
مقادير وطريقة الكريب :
فالعادة الكريب منين كنكون غادي نعملو مالح ومقلي كنعمل فبلاصة الحليب الماء
500 مل ماء
3 بيضات متوسطين أو 2 كبار
250 غ دقيق وعينك ميزانك مع الخليط حسب نوعية الدقيق
م ك زيت
ملح
رشة إبزار إختيارية
كنطرب السوائل فالخلاط ونبدى نضيف الدقيق ونطيب الكريب عادي
ونبدا نعمر كيف واضح فالصور وندوز الكريب فالبيض والشابليغ لي كنخلط معاه شوية د الدقيق وبعض المرات كنزيد معاه شوية د الزنجلان كيعطيه فالقلي طعم رائع.
ملاحظة مهمة : منين نجيو نقليو الكريب خص يكون الزيت سخون مزيــــــــــــــان باش ميتفتحش الكريب والميتشربش الزيت
منين كنطيب الكريب في مقلة كبيرة طبعا غادي الحجم ديالو وهو معمر كبير شوية فكنقسمو على زوج وبصراحة هكا كيكون ساهل فالتوجاد وكيعمر الطبسيل مزيان
بالف صحة